MP K. Vanlalvena’n media mite hmaa a thu tarlan te:

1. Mizorama kuhva chingtute manganna chungchang: Dt 13.9.2024 khan Union Minister of Agriculture Shivraj Singh Chouhan chu a office chamber ah ka hmu a. Tun hnaia Mizoram Chief Minister Lalduhoman Assembly session a a thusawi India sawrkarin kuhva chin a khap tawh ni awma a sawi avanga Mizorama kuhva chingtute leh chin tuma hma la mek tute manganna tawh thu ka sawi pui a. Chutianga khapna thupek India sawrkarin a lo siam anih chuan an order sut leh turin ka ngen nghal bawk a. Shivraj Singh Chouhan chuan chutianga kuhva chin khapna thuchhuah Central sawrkarin a chhuah loh thu leh chutiang thuthang chu thu diklo a nih thu hmai hma ngeiah min hrilh a ni.

Hei mai bakah hian Commissioner of Horticulture Prabhat Kumar pawh Dt. 20.9.2024 khan hemi chungchang hi ka sawi pui leh a. Ani pawhin Kuhva chin khapna thupek Central sawrkarin engmah thuchhuah a neih loh thu a sawi ve leh bawk a ni. Heng te a nih avang hian Mizorama kuhva chingtute leh chin zel tumtute tan mangan na tur a awm lo a ni tih Zoram mipuite hriatah ka puang duh a ni.

2. Mizorama buh chingtute tanpuina Central sawrkarin a pe thei: Union Agriculture Minister nena kan inkawm tum hian Mizoram mipuite chaw rin pui ber chu buh a nih thu leh, kan kham khawp buh kan thar loh avanga Central sawrkar puihna kan mamawh thu ka thlen a. Mizorama buh chingtute tanpuina atan Minimum Support Price emaw tangka faia tanpuina pek kan mamawh thu ka thlen nghal bawk.

3. MP-LAD Fund thawh tir chungchanga harsatna: Nikum 2023 October ni 6 ah khan 2023-2024 atana Mizoram puma ka MPLAD fund thawk tura ka thlan chhuahte list hi Aizawl DC ah ka theh lut vek tawh a. Tih dan phung pangngaiah chuan Aizawl DC office te hian MP fund thawktu tur te list hi concern district ah an thawn darh leh chhawng thin a ni. MLA General election te, Lok Sabha MP thlan te avanga model code of conduct chhuanlam avang te bakah Central sawrkar in MP Fund sem dan thar a rawn siam thar tak avang tein heng MP fund thawk tura ka thlan te hnenah hian Mizoram sawrkara district hrang hrang a DC office te leh an area huam chhunga BDO office engemaw zat te chuan Work order hun rei tak chhung an pechhuak thei lo va.

Hetianga training master pahnih ten training an pek tawh hnu thla hnih lai liam tawh hnuah pawh  DC office thenkhat leh BDO office then khat ten tun thlenga MP LAD fund nikum october thla tir a thawk tura ka thlan chhuah tawh te hnenah hna thawk tura Work Order an la pe chhuak thei lo fo hi tha lo ka ti a. Hetianga kum hlui 2023-2024 MP fund la thawh zawh loh hian kum thar MP fund 2024-2025 lo chhuak tur a dal tlat tih mipuite ka hriattir duh a.

He MP fund thawk tura work order pek chhuah muang lutuk chungchanga hma min lak sak tur hian Chief Minister zahawm tak Lalduhoma hnenah pawh Dt 23.7.2024 khan ngenna lehkha ka lo pe tawh nghe nghe a ni. MP LAD fund te hi Mizoram khua leh veng hrang hrang te hmasawnna tur atana sawrkar laipui atanga lokal a nih avang leh tihkhawtlai lohva hna thawh zawh thuai thuai a nih theih nan,  a tul anga hma min laksak turin Mizoram sawrkar hi ka ngen a. A tul dan anga disciplinary action lak thleng pawha min ngaih pawimawh sak hi ka phut bawk a ni.